【坪洲好去處】今次Glide會帶大家去一個慢活⼩島 — 坪洲⼀⽇遊。 坪洲有不少景點及好去處，包括歷史悠久嘅灰窯廠遺址、四⾯環海嘅⼿指⼭、傳統嘅祺森冰室、神秘嘅坪洲花園、文青⽣活雜貨店燈隅、擁有40年歷史嘅超記陶瓷同埋必去A NOY 麵包鋪，可以去行山、打卡之餘， 仲有很多推介的坪洲美食餐廳同cafe， 就等我哋出發去坪洲⼀⽇遊啦！(文末附坪洲船期)
坪洲一日遊 丨 坪洲好去處 丨 坪洲美食 丨 坪洲景點 丨 坪洲行山 丨 坪洲船期
【坪洲一日遊行程介紹】坪洲位於香港嘅西南面，係個四面環海嘅離島。如果由上空鳥瞰，坪洲嘅外形就好似個「凹」字咁。小島嘅面積不足一平方公里，人口亦都唔夠七千，係長洲嘅約三份之一。相比起其他離島，例如長洲同大嶼山，坪洲的生活較為樸素，島上面更加沒有任何汽車，居民都係以單車代步，而來往坪洲都係以渡輪作為交通工具。
順帶一提~ 以下提及的坪洲⼀⽇遊行程，大家都可以考慮下租單車，一路體驗單車遊，一路探索坪洲的好去處㗎！租單車可以去永安街同埋永興街，嗰度會有幾間單車鋪可以租車，租單車嘅價錢都合理㗎。
📍第一站: 打卡熱點 – 勝利灰窯廠遺址
灰窯工業曾經喺坪洲蓬勃發展，而今日就留低咗灰窯廠嘅遺址，成為坪洲歷史的一部分。喺坪洲灰窯業的頂峰時期島上有11間廠房，但今日只淨低勝利灰窯廠。現時勝利灰窯廠遺址仍然屹立住兩棟樓，當中有一棟有兩層高，而灰窯廠門前面亦有古樹同廠房磚瓦互相交纏，成為廢墟中嘅一點綠景。 勝利灰窯廠遺址而家已經成為打卡熱點，如果大家想去打卡嘅話，不妨去下坪洲嘅南灣。
地址：坪洲南灣2號 (查看地圖)
📍第二站: 坪洲行山推介 – 手指山
去完灰窯廠就可以去手指山行山享受下郊野啦～手指山係坪洲嘅最高點，只要行30至40分鐘就可以到達山頂，行山的路程唔算太長。行到山頂可以喺四面環海嘅小島眺望，享受360度嘅海景，仲可以望到南丫島、愉景灣同埋南港島添！啱晒鍾意睇海景嘅你~
前往方法：坪洲家樂徑進入
📍第三站: 坪洲美食 – 祺森冰室
行山之後咁攰就係時候醫下肚仔先啦。而祺森冰室都係坪洲受歡迎嘅餐廳之一。冰室遠近馳名嘅招牌菜就係蝦多士喇。蝦多士係即叫即炸，熱辣辣、香噴噴又脆卜卜，外層金黃色加上漲卜卜嘅薯蓉配蝦肉嘅饀料，鮮蝦仲要又粉又嫩。個個都食過返尋味，讚不絕口～除咗香脆嘅蝦多士之外，祺森冰室仲有好多必食嘅美食㗎，大家有機會一定要嚟朝聖下！
地址：坪洲永安街3號地下B舖 (查看地圖)
📍第四站: 打卡熱點 – 坪洲秘密花園 My Secret Garden
好，醫完肚，就緊係要繼續我地坪洲⼀⽇遊嘅行程！喺同一條街嘅秘密花園，前身係製作皮類製品嘅牛皮廠，被列為三級歷史古蹟，面積佔成四萬平方呎。原本被荒廢嘅牛皮廠，而家化身為裝置藝術空間。秘密花園走廊牆上掛住昔日牛皮廠嘅相，證明今時今日嘅秘密花園經歷過數十載歲月嘅洗禮。入到去會見到周圍都擺滿咗一件件嘅奇特有趣嘅藝術品，牆上面更有唔同風格嘅藝術塗鴉，每逢節日仲會設置相關裝飾嚟應節添(e.g. Halloween)，啱晒鍾意打卡嘅你 。
秘密花園🏡位於街巷內，外面有個唔太顯眼嘅招牌，如果大家想黎打卡嘅話記得要留意住喇。
地址：坪洲永安街21號 (查看地圖)
📍第五站: 文青必去 – 燈隅
睇完千奇百趣嘅秘密花園就可以轉兩個彎去到文青👓必去嘅燈隅～燈隅係一間集生活雜貨、咖啡同草本茶嘅工作室，佢原址前身係島上出名嘅生活雜貨小店——陸日小店，但由12月開始原店主就決定將呢間小店改變為一間更文藝嘅工作室。燈隅依舊售賣住古物雜貨，例如打字機、收音機、時鐘等昔日嘅舊物，但就多咗咖啡Workshop。負責本地咖啡小眾牌子「騎住鳳凰沖咖啡」嘅阿逸而家就會長駐於燈隅，舉辦咖啡製作Workshop同埋出產坪洲製造咖啡產品，當中最出名嘅就係COLD BREW仲有「靈丹妙藥」自家製咖啡豆。大家嚟到坪洲嘅話，不妨放慢腳步，喺燈隅一邊歎住坪洲咖啡，一邊享受燈隅嘅舊物，感受下燈隅帶畀大家嘅慢活態度。
地址：坪洲永興街27號地下 (查看地圖)
📍第六站: 坪洲好去處 – 超記陶瓷釉上彩 Workshop
如果覺得燈隅嘅古物同咖啡Workshop仲未夠喉嘅話，都可以選擇去超記陶瓷～超記陶瓷係少數仲存活緊嘅釉上彩瓷器廠，由林超先生同太太開辦，已經有超過40年歷史，一直保留住具有傳統工藝嘅瓷器。超記陶瓷仲有釉上彩陶瓷Workshop參加，可以俾遊客以天然顏料繪畫，製作獨一無二嘅彩繪瓷器，成為手工藝製作愛好者嘅好去處。不過由於Workshop係不定期舉行，所以大家喺去之前記得查詢下先呀～
地址：坪洲永興街7號地下 (查看地圖)
電話號碼：9193 8044
📍第七站: cafe推介 – Island Table Grocer Cafe
行足一日走，可以去白色小屋cafe坐下打卡飲咖啡。呢間cafe係由幾姊妹原居民開既，除左有coffee + patries之外亦有賣西或食材，好有特色！
地址： 坪洲永興街9C號地舖 (查看地圖)
📍第八站: 必食芝麻餅 – A NOY 麵包舖
走之前記得試埋 A NOY 麵包舖嘅南乳芝麻餅呀～鬆脆嘅芝麻餅加上粉過嘅黑、白芝麻，再配上一陣淡淡地嘅南乳味，散發住一陣聞到都流晒口水嘅芝麻香味～就連平時唔太好南乳味嘅遊客都接受到南乳芝麻餅。而且每塊芝麻餅都係即日新鮮出爐，拎上手都感受到餅嘅微溫，所以大家記得趁熱食呀～
地址：坪洲永興街11號地舖 (查看地圖)
坪洲適合晒平時忙到甩碌嘅都市人，感受下呢合小島嘅慢活態度，同男女朋友拍拖，去感受下寫意閒適又得，同朋友仔去亦得，係一個適合男女老幼到訪嘅好去處～
坪洲船期
1.中環去坪洲 （查詢坪洲船期）
中環6號碼頭搭渡海小輪至坪洲碼頭，船程大約30至45分鐘。
價錢:
普通渡輪 (船程40分鐘)： $15.9 (平日)、$22.8 (假期)
快速渡輪 (船程30分鐘)： $29.6 (平日)、$43.5 (假期)
2.愉景灣去坪洲 （查詢船期）
愉景灣(稔樹灣)碼頭搭坪洲街渡至坪洲碼頭，船程大約10分鐘。
價錢：
星期一至六：$12
星期日及公眾假期：$15
想隨時緊貼旅行／本地行程
你可能也會感興趣：
_______________________________________________________________
參加不同國家主題#香港好去處#尋找旅行感 系列 的本地工作坊
歡迎旅人按link投稿分享您的獨家旅程+享有獨家優惠！
想計劃旅遊行程更加得心應手？早鳥登記我們最新動態！
LIKE Glide劃翔 Facebook 然後選擇「See First」盡享旅遊快訊！
FOLLOW Glide劃翔 Instagram 探索獨一無二旅遊行程！
0 comments on “【坪洲好去處】一日遊打卡秘密花園、行山、品嚐特式美食 (文末附坪洲船期)”