大自然型 打卡熱點 放鬆心情型 文青型

【坪洲一日遊 】必去慢活小島 坪洲好去處、行山、美食、咖啡

【香港離島一日遊:必去慢活小島 坪洲】 坪洲位於香港嘅西南面,係個四面環海嘅離島。如果由上空鳥瞰,坪洲嘅外形就好似個「凹」字咁。小島嘅面積不足一平方公里,人口亦都唔夠七千,係長洲嘅約三份之一。島嘅上面並冇任何汽車,居民都係以單車代步,而來往坪洲都係以渡輪作為交通工具。

今次Glide帶大家去【香港離島一日遊】必去慢活小島 — 睇晒坪洲行山、坪洲美食、坪洲沙灘!

坪洲好去處 丨 坪洲一日遊 丨香港離島 丨 離島一日遊 丨 慢活

【坪洲一天攻略】坪洲位於香港嘅西南面,係個四面環海嘅離島。如果由上空鳥瞰,坪洲嘅外形就好似個「凹」字咁。小島嘅面積不足一平方公里,人口亦都唔夠七千,係長洲嘅約三份之一。相比起其他離島,例如長洲同大嶼山,坪洲的生活較為樸素,島上面更加沒有任何汽車,居民都係以單車代步,而來往坪洲都係以渡輪作為交通工具。今次就等Glide嘅坪洲一日遊,就會帶大家去歷史悠久嘅灰窯廠遺址、四面環海嘅手指山、傳統嘅祺森冰室、神秘嘅坪洲花園、文青生活雜貨店燈隅、擁有40年歷史嘅超記陶瓷同埋必去A NOY 麵包鋪!就等我哋出發坪洲一日遊啦!

📍第一站: 灰窯廠遺址

灰窯工業曾經喺坪洲蓬勃發展,而今日就留低咗灰窯廠嘅遺址,成為坪洲歷史的一部分。喺洲灰窯業的頂峰時期島上有11間廠房,但今日只淨低勝利灰窯廠🪨。今日嘅灰窯廠遺址仍然屹立住兩棟樓,當中有一棟有兩層高,而灰窯廠門前面亦有古樹同廠房磚瓦互相交纏,成為廢墟中嘅一點綠景。灰窯廠而家已經成為打卡熱點,如果大家都鍾意喺廢墟嘅地址打卡嘅話,不妨去去坪洲嘅南灣。

地址:坪洲南灣2號

📍第二站: 手指山

去完灰窯廠就可以去手指山行山享受下郊野啦~手指山係坪洲嘅最高點,只要行30至40分鐘就可以到達山頂,路程唔算長。上到山頂可以喺四面環海嘅小島眺望,享受360度嘅海景,仲可以望到南丫島、愉景灣同埋南港島添!啱晒鍾意睇海景嘅你!

前往方法:坪洲家樂徑進入

📍第三站: 祺森冰室

行完山咁攰就係時候醫下肚仔先啦。而祺森冰室都係島內受歡迎嘅冰室之一。冰室遠近馳名嘅招牌菜就係蝦多士喇。蝦多士係即叫即炸,熱辣辣、香噴噴又脆卜卜,外層金黃色加上漲卜卜嘅薯蓉配蝦肉嘅饀料,鮮蝦仲要又PINK又嫩。個個都食過返尋味,讚不絕口~除咗香脆嘅蝦多士之外,祺森冰室仲有好多必食嘅美食㗎,大家有機會一定要嚟朝聖下!

地址:坪洲永安街3號地下B舖

📍第四站: 坪洲秘密花園 My Secret Garden

好,醫完肚,就緊係要繼續行程!喺同一條街嘅秘密花園前身係製作皮類製品嘅牛皮廠,被列為三級歷史古蹟,面積佔成四萬平方呎。原本被荒廢嘅牛皮廠,而家化身為裝置藝術空間。秘密花園走廊牆上掛住昔日牛皮廠嘅相,證明今時今日嘅秘密花園經歷過數十載歲月嘅洗禮。入到去會見到周圍都擺滿咗一件件嘅奇特有趣嘅藝術品,牆上面更有唔同風格嘅藝術塗鴉,每逢節日仲會設置相關裝飾嚟應節添(e.g. Halloween)。

秘密花園🏡位於街巷內,外面有個唔太顯眼嘅招牌,如果大家想黎打卡嘅話記得要留意住喇。

地址:坪洲永安街21號

📍第五站: 燈隅

睇完千奇百趣嘅秘密花園就可以轉兩個彎去到文青👓必去嘅燈隅~燈隅係一間集生活雜貨、咖啡同草本茶嘅工作室,佢原址前身係島上出名嘅生活雜貨小店——陸日小店,但由12月開始原店主就決定將呢間小店改變為一間更文藝嘅工作室。燈隅依舊售賣住古物雜貨,例如打字機、收音機、時鐘等昔日嘅舊物,但就多咗咖啡Workshop。負責本地咖啡小眾牌子「騎住鳳凰沖咖啡」嘅阿逸而家就會長駐於燈隅,舉辦咖啡製作Workshop同埋出產坪洲製造咖啡產品,當中最出名嘅就係COLD BREW仲有「靈丹妙藥」自家製咖啡豆。大家嚟到坪洲嘅話,不妨放慢腳步,喺燈隅一邊歎住坪洲咖啡,一邊享受燈隅嘅舊物,感受下燈隅帶畀大家嘅慢活態度。

地址:坪洲永興街27號地下

📍第六站: 超記陶瓷釉上彩 Workshop

如果覺得燈隅嘅古物同咖啡Workshop仲未夠喉嘅話,都可以選擇去超記陶瓷~超記陶瓷係少數仲存活緊嘅釉上彩瓷器廠,由林超先生同太太開辦,已經有超過40年歷史,一直保留住具有傳統工藝嘅瓷器。超記陶瓷仲有釉上彩陶瓷Workshop參加,可以俾遊客以天然顏料繪畫,製作獨一無二嘅彩繪瓷器,成為手工藝製作愛好者嘅好去處。不過由於Workshop係不定期舉行,所以大家喺去之前記得查詢下先呀~

地址:坪洲永興街7號地下

電話號碼:9193 8044

超記陶瓷釉上彩 Facebook

📍第站: Island table grocer cafe

行足一日走,可以去白色小屋cafe坐下打卡飲咖啡。呢間cafe係由幾姊妹原居民開既,除左有coffee + patries之外亦有賣西或食材,好有特色!

📍第八站: A NOY 麵包舖 必食芝麻餅

走之前記得試埋 A NOY 麵包舖嘅南乳芝麻餅呀~鬆脆嘅芝麻餅加上粉過嘅黑、白芝麻,再配上一陣淡淡地嘅南乳味,散發住一陣聞到都流晒口水嘅芝麻香味~就連平時唔太好南乳味嘅遊客都接受到南乳芝麻餅。而且每塊芝麻餅都係即日新鮮出爐,拎上手都感受到餅嘅微溫,所以大家記得趁熱食呀~

地址:坪洲永興街11號地舖

【坪洲一日遊 】坪洲好去處 必去慢活小島 — 坪洲

順帶一提,上面提咗咁多景點,其實大家都可以選擇租單車,一路體驗單車遊,一路探索坪洲㗎!租單車可以去永安街同埋永興街,嗰度會有幾間單車鋪可以租車,租車價錢都合理㗎。

坪洲適合晒平時忙到甩碌嘅都市人,感受下呢合小島嘅慢活態度,同男女朋友拍拖,去感受下寫意閒適又得,同朋友仔去亦得,成為適合男女老幼到訪嘅好去處~

坪洲船期

1.中環去坪洲 (查詢坪洲船期

中環6號碼頭搭渡海小輪至坪洲碼頭,船程大約30至45分鐘。

價錢:
普通渡輪 (船程40分鐘): $15.9 (平日)、$22.8 (假期)
快速渡輪 (船程30分鐘): $29.6 (平日)、$43.5 (假期)

2.愉景灣去坪洲 (查詢船期

愉景灣(稔樹灣)碼頭搭坪洲街渡至坪洲碼頭,船程大約10分鐘。

價錢:
星期一至六:$12
星期日及公眾假期:$15

想隨時緊貼旅行/本地行程


你可能也會感興趣:

【香港離島一日遊】鴨脷洲 體驗舊香港風情

【香港離島一日遊】香港南極 蒲台島

_______________________________________________________________

參加不同國家主題#香港好去處#尋找旅行感 系列 的本地工作坊
歡迎旅人按link投稿分享您的獨家旅程+享有獨家優惠!
想計劃旅遊行程更加得心應手?早鳥登記我們最新動態!
LIKE Glide劃翔 Facebook 然後選擇「See First」盡享旅遊快訊!
FOLLOW Glide劃翔 Instagram 探索獨一無二旅遊行程!

0 comments on “【坪洲一日遊 】必去慢活小島 坪洲好去處、行山、美食、咖啡

Leave a Reply

%d bloggers like this: